Hargeysa (SLpost)- Madaxweynaha Somaliland Md Muuse Biixi Cabdi, ayaa faahfaahin ka bixiyey kulan magaalada Addis Ababa ku dhexmaray Madaxweynaha Soomaaliya Maxamed Cabdilaahi Farmaajo, kaddib marti-qaad uu ka helay Raysal-wasaaraha dalka Itoobiya Abiy Ahmed.
Mudane Muuse Biixi Cabdi waxa uu sheegay in kulanka dhexmaray madaxweynaha Soomaaliya uu ahaa mid kedis ah oo aan hore loo sii qorsheyn kaddib markii uu Raysal-wasaaraha Itoobiya ku marti-qaaday xafiiskiisa, kaddibna ku war-geliyey inuu la joogo isla markaana u imanayo madaxweynaha Soomaaliya.
Madaxweyne Biixi oo arrintan kaga hadlay khudbad-sannadeedka dastuuriga ah oo uu ka jeediyey fadhi ay isugu yimaaddeen laba Gole baarlamaan, waxa uu sheegay in kulankaasi ahaa mid saddex-geesood ah oo dhexmaray saddexdooda hoggaamiye oo kali ah, halkaas uu Raysal-wasaaraha Itoobiya ugu soo jeediyey inuu dhex-galo oo uu dib u furo wada-hadalladii u dhexeeyey labada dal.
Madaxweynaha oo arrimahan ka hadlayey waxa uu yidhi, “Waxaynu wada ogayn in wada-hadalkii Somaliland iyo Soomaaliya muddo hakad ku jireen. Hase yeeshee, 11-kii Bisha February 2020, ayaa aniga iyo Madaxweynaha Soomaaliya, si kedis ah ugu kulannay magaalada Addis Ababa ee Dalka Itoobiya.
09-kii February 2020, waxaan safar shaqo ugu baxay magaalada Addis Ababa ee dalka Itoobiya, si aan u xoojiyo wefti uu hoggaaminayey Wasiirka Arrimaha Dibedda, oo ka ololaynayey wufuudii Shirka 33-aad ee Midowga Afrika iskugu timi. 11-kii Bisha February 2020, waxa igu marti-qaaday Xafiiskiisa Ra’iisal Wasaaraha Dalka Itoobiya, Dr. Abiye Ahmed. Salaan, soo dhawayn iyo kulan kooban kadib, waxa uu ii sheegay in Madaxweynihii Soomaaliya uu isna soo galayo Xafiiska Ra’iisal Wasaaraha in yar kadib. Halkaa ayuu ka bilaabmay kulan kedis ah, oo saddex geesood ah, oo aan hore loo sii qorshayn, oo dhexmaray saddexdayada.”
Md Muuse Biixi Isaga oo hadalkiisa sii watay, waxa uu intaas ku daray oo yidhi, “Ra’iisal Wasaaraha Itoobiya waxa uu soo jeediyey in uu dhex-galo dhibaatada dhex-taala labada dal ee Jamhuuriyadda Somaliland iyo Soomaaliya, maadaama ay tahay qadiyad ka aloosan Gobolka Geeska Afrika, oo uu Ra’iisal Wasaaruhuna u ololeeyo nabadda, horumarka iyo Iskaashiga Gobolka Geeska Afrika. Dabcan, Ra’iisal Wasaaraha Itoobiya oo ah shakhsi ku guulaystay Abaal-marinta Nabadda Adduunka ee (Noble Peace Price), isla markaana hoggaamiya dalka labaad ee ugu dadka badan Qaaradda Afrika; Somaliland ahaan waanu aqbalnay soo jeedinta Ra’iisal Wasaaraha Itoobiya.
Kulanku intaas ayuu ku ekaa. Waxa loo ballamay in faah-faahinta iyo ajendaha la galo wixii intaa ka dambeeya. Waxa jira Dawlado kale oo iyaguna hore ugu hawlanaa wada-hadalka Jamhuuriyadda Somaliland iyo Soomaaliya, hase yeeshee, kulanka Ra’iisal Wasaaraha lagagama wada-hadal wax tafaasiil ah oo ku saabsan cidda ka qayb noqon doonta wada-hadalka, waxaanu ku koobnaa kulankaasi soo-jeedin iyo aqbalaad.”
Somalilandpost.net
webmaster@somalilandpost.net
