Hargeysa (SLpost)- Madaxweynaha Somaliland Md Axmed Maxamed Siilaanyo, ayaa ehelkii, qaraabadii iyo Shacbiga Somaliland ee uu ka baxay ka tacsiyeeyey Alle ha u naxariistee Marxuum Cabdilaahi Cabdi Faarax (Deyr) oo maanta ku geeriyooday laguna aasay magaalada Hargeysa.
Alle ha u naxariistee Marxuum Deyr, ayaa ka mid ahaa Saraakiil dhalasho ahaan ka soo jeeda Somaliland oo fuliyey Af-gembi fashilmay oo lagu sameeyey Dowladdii Jamhuuriyadda Soomaaliya sannadkii 1961-kii kaddib markii cadaalad-darro lagala kulmay Midowgii Somaliland iyo Soomaaliya, Isku-deygaas Af-gembi oo lagu tilmaamo inuu yahay kii ugu horreeyey ee laga fuliyo qaaradda Afrika kaddib markii ay guumaystayaashii reer Yurub xornimada ka qaateen inta badan dalalka Afrika sannadkii 1960-kii oo lagu magacaabo sannadkii xornimada Afrika.
Sida lagu sheegay dhambaal tacsi ah oo ka soo baxay xafiiska afhayeenka madaxtooyada, madaxweynuhu waxa uu sifeeyey shakhsiyaddii marxuumka iyo doorkii uu ka soo qaatay hannaankii dib-u-dhiska iyo nabadeynta dalka, waxaanu Eebbe uga baryey marxuumka inuu naxariistii Janno ka warbaabiyo, ehelkii iyo qaraabadii uu ka baxayna samir iyo iimaan ka siiyo.”
“Madaxweynaha Jamhuuriyada Somaliland, Mudane, Axmed Maxamed Siilaanyo waxa uu tacsi u dirayaa Qoyskii Eheladii, Qaraabadii, Asxaabtii iyo guud ahaan Shacbiga Somaliland isaga oo ka tacsiyadaynaaya geerida ku timid Marxuum Cabdilaahi Cabdi Faarax (Dayr), oo taariikhda maanta ee 19/09/2015 ku geeriyootay Magaalada Hargeysa.
Marxuum Cabdilaahi Cabdi Faarax (Dayr) waxa uu ka mid ahaa saraakiishii ugu horeeyey ee qaybta ka ahaa ciidamada wakhtigii ay Somaliland qaadatay xoriyada 1960kii, isagoo ka mid ahaa 1961kii koox saraakiila oo ka qaybqaatay inqilaabkii fashilmay oo ay doonayeen saraakiishaasi in ay ku soo celiyaan midnimadii lagu hungoobay, ahaana wakhtigaa maayar ku xigeenka Muqdisho.
Marxuumku isaga oo halkii ka sii wada dedaalkii iyo dib u dhiskii qaranka Somaliland waxa uu ka soo shaqeeyey nabadayntii iyo farxad kuwada noolaanshaha beelaha wada dega somaliland isaga oo xilal kala duwan ka soo qabtay dalka 1996-1998kii waxa uu ahaa gudoomiye iyo Duqa Berbera ka ahaa Gobolka saaxil.
Madaxweynuhu waxa uu marxuumka Alle uga baryayaa inuu naxariistii jannatu fardawsa ka waraabiyo, Qoyskii, Eheladii, Qaraabadii, Asxaabtii iyo shacbiga Somaliland ee uu ka baxdayna Samir iyo iimaan saadiqa ka siiyo,”sidaas ayaa lagu sheegay dhambaalka tacsida ah ee madaxweynuhu kaga hadlay shakhsiyadii marxuumka.
Somalilandpost.net
Hargeysa
