Nairobi (SLpost)- Madaxweynaha dalka Kenya Uhuru Kenyatta, ayaa sheegay in hawlgalkii xarunta ganacsiga Westgate oo afar maalmood ah socday ay soo gebagebeyeen, isla markaana ganacta ku dhigeen 11 qof oo ka mid ah malleeshiyaadkii weerarka ku qaaday goobtaas, isla markaana ay dileen shan ka mid ah.
Madaxweynaha Kenya oo caawa telefishanka dalkaas kala hadlay shacabkiisa, ayaa sheegay in saddex dabaq oo ka mid ah afarta dabaq ee dhismaha Xarunta Ganacsi ka koobnaa ay gebi ahaanba dumeen intii lagu gudo-jiray hawl-galka lagula dagaalamayey kooxaha maleeshiyaadka ah ee weeraray xaruntaas.
“Waan dulaynay, isla markaana jebinay kuwii na soo weeraray,” ayuu Kenyatta, ka sheegay khudbad uu caawa ka jeediyey telefishanka dalkiisa. “Si weyn ayaa la inoo dhaawacay, laakiin, geesiyaal ayeynu noqonay, kuna midownay oo xoogaysanay. Waan jebinay cadowgeenii, una muujinay adduunka waxaan qabsan karno.”
Madaxweynaha Kenya waxa uu sheegay sheegay inay dileen shan ka mid ah argagaxisadii weerarka soo qaaday, halka 11 kalena gacanta ku dhigeen oo booliisku hayo. “Khasaaraheenu wuu balaadhan yahay,” ayuu yidhi ka dib markuu cadeeyey in 67 qof ku waayeen weerarkaa, kuwaas oo 61 ka mid ahi shacab ahaayeen, halka lixda kale ciidamada Kenya ahaayeen, halka sidoo kale dad gaadhaya 240 ku dhaawacmeen.
Madweynaha Kenya waxa uu sheegay in saddex maalmood oo baroor-diiq ah loo samayn doono dadkii ku dhintay weerarkii Westgate, calanka wadankaasna hoos loo dhigi doono. Mr Kenyatta waxa uu caddeeyey in Xilligii hawlgalku socday saddex dabaq oo dhismaha ka mid ah dumeen. “Argagxisadii iyo shacabkii waxay weli ku jiraan burburkii hoostiisa,” ayuu sheegay, isaga oo intaas ku daray inay weli wadaan baadhitaano lagu ogaanayo dhalashada argagaxisadii weerarka soo qaaday. “Khubarada faraha ayaa wada baadhitaano lagu xaqiijinayo wadamada ay ka soo jeedaan argagaxisadii,” ayuu yidhi Kenyatta.
Madaxweyne Kenyata waxa u ballanqaaday in xukuumadiisu talaabo ka qaadi doonto argagaxisada weerarkan ka dambeeyey, “Fulayda weerarka soo qaaday waxa la marin doonaa cadaaladda, iyo dhamaan intii gacan ku lahayd weerarkooda meel kastoo ay joogaan.”
Xoogag taabacsan Al-shabaab ayaa Sabtidii todobaadkan gudaha u galay xarunta ganacsiga Westgate ee dalka Kenya, halkaasoo maalintii shanaad ay kula dagaalamayaan ciidamada Kenya iyo ciidamo ka socda dalka Israa’iil oo caawinaya.
SOMALILANDPOST.NET
contact@somalilandpost.net
