Hargeysa (SLpost)- Wasiirka Wasaarada Warfaafinta iyo Wacyigelinta Jamhuuriyada Somaliland Mudane Cabdi Yuusuf Ducaale “Boobe” ayaa kulan hawleed lagaga arrinsanayo qiimaynta wasaarada iyo waxqabadkeeda waxa uu maanta ka furay huteelka Maansoor ee Caasimada Hargaysa .
Kulan hawleedkan waxaa ka qayb qaadanaya sodon xubnood oo ka tirsan Agaasimayaasha Waaxyaha Wasaaradda, Madax qaybeedyada, la taliyayaasha gaarka ah ee Wasiirka Warfaafinta, Gudoonka Ururka Suxufiyiinta Somaliland ee Solja iyo Xubno ka kala socday Dalada Dhallinyarada ee Sonyo iyo Akaadamiyada Nabada iyo Horumarka Somaliland Kaas oo socon doona mudo sadex cisho ah.
Kulankan waxaa si gaar ah loogu eegi doonaa sida ay mas’uuliyiinta iyo hawl wadeenada kale ee wasaarada warfaafintu u ogaan lahaayeen halka ay xiligan taagan tahay Wasaaradu, Waxyaabaha u qabsoomay, waxa ka qabyada ah, dhibaatooyinka hortaagan iyo fursadaha ay haysato.
Agaasimaha Guud ee Wasaarada Warfaafinta Faysal Cali Sheekh Maxamed oo madashaasi ka hadlay ayaa ka waramay waxyaabihii u qabsoomay wasaarada mudadii ay xukuumada cusub ee uu hogaaminayo madaxweyne axmed siilaanyo haysay talada dalka waxaanu xusay inay markii u horaysay ku guulaysteen in Telefishanka Qaranka laga daawado qaaradaha Yurub iyo Ameerica waxaa kale oo uu xusay inay dhawaan rakibi doonaan idaacad weyn oo dalka guud ahaantii wada gaadha taas oo Warar iyo Wacyigelinba ay ka heli doonaan shacbiga Somaliland isla markaana laga dhagaysan doono Guud ahaan mandaqada aynu ku nool nahay iyo dalalka kale ee ka baxsan.
Agaasimaha guud waxa uu intaa ku daray in ugu yaraan afar luqadood ay baahiso warbaahinta qaranku, hadana ay ku hawlan yihiin mashruuc balaadhan oo lagu habaynayo laguna dayactirayo Studio-yaasha waaxyaha wasaarada.
Faysal Cali Sheekh waxa uu Xusay in wasaarad ahaan xidhidh ay la soo yeesheen wasaaradaha warfaafinta ee wadamada deriska inala ah sida jabuuti iyo Itoobiya, saxaafada madaxa banaan iyo hay’adaha shaqaalaha
Agaasimaha Guud ee Wasaarada Warfaafintu waxaa kale oo uu sheegay inaan la dafiri Karin inay jiraan waxyaabo u baahan in si wada jir ah loogu hawl galo wax ka qabashadooda .
Wasiirka Wasaarada Warfaafinta iyo Wacyigelinta Jamhuuriyada Somaliland Mudane Cabdi Yuusuf Ducaale “Boobe” ayaa hadal uu madashaasi ka jeediyay waxa uu tilmaamay mudnaanta ay leedahay wasaarada warfaafintu iyo hawlaha ay qaranka u hayso wasiirku waxa uu sheegay in loo baahan yahay sidii shaqaalaha wasaaradu ay si wadar ah hawsha qaranka uga soo dhalaali lahaayeen.
Wasiirka Wasaarada Warfaafintu waxaa kale oo uu iftiimiyay inuu awooda saari doono daryeelka shaqaalaha iyo agabka wasaaradda ku hawl gasho, isagoo intaas ku daray inuu u hawl gali doono sidii tababaro kor loogu qaadayo aqoonta shaqaalaha ka hawl gala wasaarada warfaafinta loo heli lahaa.
Mudane Cabdi Yuusuf Ducaale “Boobe” waxa uu cadeeyay in sababta kulan hawleedkan la isugu yimid ay salka ku hayso sidii loo heli lahaa waajibaad cad oo lagu wada shaqeeyo isla markaana lagu wada xisaabtamo, si loo ogaado ayuu yidhi halka aynu higsanayno.
Kulanka maanta ayaa waaxyaha wasaarada waxaa fursad loo siiyay inay warbixin ka jeediyaan kuna sharaxaan sida ay tahay marxalada shaqo,qalab, aqooneed,tababar iyo baahiyaha lagama maarmaanka u ah waaxyahooda, halka qaybaha hadhayna ay berri ka jeedin doonaan.
SLpost News/Hargeysa
