Ceerigaabo (SLpost)- Inta la ogyahay Afar Qof ayaa ku dhaawacmay iska horimaadyo rabsho wata oo caawa ka dhacay magaalada Ceerigaabo ee Xarunta gobolka Sanaag, kuwaas ooay samaynayeen qaybo ka mid ah shacabka magaalada Deggen oo ka soo hor jeeda Lacagta Shilinka Somaliland oo xukuumaddu dhowaan si rasmi ah uga hirgelisay magaaladaas oo labaatankii sanno ee u dambeeyey laga isticmaalayey lacagta Shilinka Soomaaliga ah.
Mudaharaadka rabshada wata ee caawa ka dhacay magaalada Ceerigaabo oo markii dambe isu-beddelay in laysu adeegsado hubka noocyadiisa kala duwan, ayaa ka dambeeyey ka dib markii badhtmaha suuqa magaalada ay Weerareen dadweyne gadoodsan oo ka soo horjeeda beddelka lacagta Giimbaarta oo xukuumadda Somaliland dhowaan ugu beddeshay Shilinka Somaliland.
Dadka mudaharaadka samaynayey ayaa la sheegay inay soo galeen isla markaana weerarro ku qaadeen meherado ganacsi oo ku yaala badhtamaha Suuqa magaalada, kuwaas oo khasaare kala duwan la soo gaadhsiiyey, waxaanay markii dambe magaalada gudaheeda ka bilaabmay isku-dhac dhexmaray dadka mudaharaadka samaynayey iyo ganacsatada iska leh meheradaha la weeraray oo rasaas u adeegsaday inay isaga caabiyaan mudaharaadayaasha rabshadaha la soo galay badhtamaha suuqa, kuwaas oo iyaguna adeegsaday qoryaha noocyadooda kala duwan.
Maamulka gobolka iyo degmada Ceerigaabo oo aanu isku daynay inaanu la xidhiidhno si aanu wax uga weydiinno dhacdadan, ayaan noo suurto-galin, haseyeeshee wararka laga helayo magaalada Ceerigaabo, ayaa sheegay in isku-dhaca dadweynaha dhexmaray uu ka bilaabmay mudaharaad ay magaalada gudaheeda ka sameeyeen dadweyne isugu jira Dhalinyarada iyo Haweenka Xaafadaha Koonfurta iyo Bariga Ceerigaabo, ka dib markii ciidamada Boolisku maanta Xabsiga u taxaabeen xubno ka mid ah Ganacsatada magaalada oo ka dhega-adaygay Joojinta isticmaalka lacagta Shilinka Soomaaliga ah ee la beddelay, iyaga oo sida la sheegay ku doodaya Sicir-barar ka dhashay isku-beddelka lacagta Shilinka Somaliland iyo lacagta Giimbaarta ah ee isticmaalkeeda la joojiyey. Haseyeeshee, warar kale, ayaa iyaguna sheegaya in mudaharaadku ka dhashay ka dib markii dadkaasi caawa telefishannada ka daawadeen Guddoomiyaha Baanka Somaliland Md Cabdi Dirir Cabdi oo sheegay inay Xukuumad ahaan soo gunaanadeen isla markaana ku guulaysteen beddelka lacagta Giimbaarta ah, taas oo lagu sheegay inay sabab u ahayd gadoodka dadka mudaharaadka sameeyey.
Wariye ka hawl-gala magaalada Ceerigaabo oo goor-dhawayd khadka telefonka ugu warramay shabakadda Somalilandpost, ayaa sheegay inay rasaas googoos ahi ka socota badhtamaha magaalada, taas oo sababtay in albaabada loo laabo meheradaha ganacsi ee magaalada, isla markaana qaybo badan oo ka mid ah magaalada ay korontadu ka go’day, ka dib markii rasaasta lays weydaarsanayey ay haleeshay xadhkaha Korontada ee magaalada.
Iska-horimaadkan oo markii dambe ku fiday Xaafadaha magaalada, ayuu wariyuhu sheegay inuu dhexmaray dadweyne Gadoodsan oo Bannaan-baxooda ka soo bilaabay Bariga iyo Koonfurta magaalada, halka dhinaca kalena ay yihiin Shacabka kale ee ku dhaqan qaybaha kale ee magaalada, kuwaas oo Suuqyada Xaafadahooda ku yaala la soo weeraray.
Wariyuhu waxa uu intaas ku daray in iska horimaadkani uu sababay dhaawaca Afar qof oo shacab ah, kuwaas oo wakhtigan lagu daawaynayo cusbitaalka Guud ee magaalada Ceerigaabo, isla markaana aanay jirin wax ciidamo ah oo gurmad ka galay deminta rabshadaha dhexmaray Shacabka magaalada.
Wefti uu hoggaaminayo Guddoomiyaha Baanka Somaliland oo dhawaan socdaalka ku tagay gobolka Sanaag, ayaa hawl-gal muddo laba maalmood ah socday shacabka magaaladaas kaga beddelay lacagta Shilinka Soomaaliga ah oo gobolkaas laga isticmaalayey labaatankii sanno ee u dambeeyey, taas oo saamayn ku yeelatay dhaqaalaha iyo ganacsatada Sanaag oo khaati ka joogay lacago been abuur ah oo lagu soo macmalay maamul-goboleedka Puntland ee Somaliya.
Dadweynaha Gobolka Sanaag, gaar ahaan magaalada Ceerigaabo oo go’doon kaga jiray isku-xidhnaanta Ganacsiga ee gobollada kale ee dalka, ayaa si weyn u soo dhaweeyey lacagta Shilinka Soomaaliga ah ee loogu beddelay Shilinka Somaliland.
LA SOCO WIXII WARAR AH EE KA SOO KORDHA
SOMALILANDPOST.NET
contact@somalilandpost.net
