Balli-Gubadle (SLpost)- Laba Ruux ayaa ku dhintay mid kalena waxa soo gaadhay dhaawac, ka dib markii sida la sheegay Duhurnimadii shalay ay niman hubaysani rasaas ku fureen Xaafado Xoolo-dhaqato ah meesha la yidhaahdo Dacawalay oo ka tirsan deegaanka Abbokor Axmed ee killalka shanaad ee Itoobiya.
Sida ay noo xaqiijiyeen qaar ka mid ah Odayaasha deegaanka gobolka Hawd, iska hor imaadka ayaa ka dhacay Tuulada Dacawalay oo dhinaca Galbeed kaga beegan Degmadda Abbokor Axmed oo ka tirsan deegaanka Ismaamulka Soomaalida Killalka Shanaad ee dalka Itoobiya..
Wararka laga helayno deegaankaasi waxa kale oo ay sheegayaan in is rasaasayntaasi ay ku dhinteen laba nin oo magacyadoodu kala ahaayeen Marxuum Yuusuf Axmed (Jees) iyo marxuum Axmed Muxumed Sheekh Xuseen, waxaana la caddeeyay in ay dhinteen, halka uu dhaawac halis ahi soo gaadhay Yuusuf Qodax oo labadaasi marxuum la joogay. Meydka Labada marxuum iyo dhaawaca ninkaasi ayaa la sheegay in la soo gaadhsiiyay xalay ahaan degmadda Laanqayta oo ka tirsan killalka shanaad ee Itoobiya, halkaas oo Meydka labadaasi nin lagu aasi doono.
Ma jiro illaa hadda wax war ah oo ka soo baxay dhinaca maamulka deeegaanka uu dilku ka dhacay iyo beelaha uu dilkani dhex maray toona.
Bilihii ugu dambeeyay ayaa waxa degaankaasi ka taagnaa cabsi iyada oo ay labada beelood ee ay ka soo jeedaan nimanka la dilay iyo kuwa dilka geystay, uu dhawaan dhex maray dagaal fool ka fool ah. Dagaalkaasi oo ku dhex maray deegaanka Abbokor Axmed, waxaana dagaalkaasi labada beelood ka soo gaadhay khasaare dhimasho iyo dhaawacba isugu jira.
Somalilandpost.net
Editor@somalilandpost.et