Dimishiq (SLpost)- Sarkaal Sare oo ka socda Dalka Iiraan oo booqasho ku jooga caasimadda Dalka Suuriya ee Dimishiq, ayaa ku Hanjabay Israa’iil inay ka Shalleyn doonto weerarkii gardarrada ahaa ee ay ku qaadday dalka Suuriya, isaga oo sheegay in Dunida Muslimku diyaar u tahay inay Difaacaan Shacabka reer Suuriya.
Siciid Jaliili oo ah Madaxa Golaha Bad-baadada Qaranka Iran oo maanta soo gabo-gabeeyey socdaal saddex maalmood qaatay oo dalkaas ku joogo, waxa uu sheegay in dawladdiisu taagerayso wada-hadal kasta oo bar-bilow u noqda xabbad joojin dhexmarta xukuumadda madaxweyne Bashar Assad iyo kooxaha ka soo horjeeda si loo gunaanado dagaalka Sokeeye ee Suuriya ee ka socda, haseyeeshee waxa uu shuruud ka dhigay in wada-hadal kasta oo labada dhinac dhexmara uu ku qabsoomo caasimadda Syria ee Dimishiq.
Jaliili oo maanta warbaahinta kula hadlay shir-jaraa’id oo u qabtay magaalada Dimishiq, waxa uu hanjabaad u jeediyey dawladda Yuhuudda.
“Sidii ay Israel uga shallayday gar-darradeedii ka dhashay dagaalladii 33-maalmood, 22-maalmood iyo Siddeeda maalmood, maanta waxa ay Sahnuuniyiintu ka shallaayn doonaan gar-darrada ay kula kacday Suuriya,” ayuu yidhi Jaliili oo tilmaamaya dagaaladii ay Israel la gashay Ururka Xisbullah ee dalka Lubnaan iyo ururka Falastiiniyiinta ee Xamaas.
“Dunida Islaamku ogolaan mayso gar-darro lagula kaco Syria,” ayuu yidhi Jaliili, isaga oo intaas ku daray, “Suuriya waxa ay ku taala Jiidda hore ee Dunida Muslimka ee ku beegan maamulka Sahnuuniyadda.”
Si kastaba ha ahaatee, Saciid Jaliili muxuu sheegin sida ay Israel uga shallayn doonto weerarkeeda iyo weliba qaabka ay dunida Muslimku u difaacayso Suuriya.
Hanjabaadda Sarkaalkan ka tirsan hoggaamiyeyaasha sarsare ee dawladda Iiraan, ayaa ku soo beegmay maalmo ka dib markii Diyaaradaha Dagaalka ee Israel Duqayn u geysteen goob ku taala nawaaxiga caasimadda Dimishiq, iyaga oo bartilmaameedsanaya wax ay Maraykanku ku sheegeen Sawaariikhda Dhulka laga gano oo loo waday ururka Xisbullah.
Dawladda Suuriya ayaa dhankeeda sheegtay in diyaaradaha Israel ay bartilmaameedsadeen xarunta Cilmi-baadhiseed oo Milatarigeedu leeyihiin, waxaanay nidar ku martay inay Ka aar-goosan doonaan, haseyeeshee ilaa imika wax ka jawaab ah kamay bixin.
Dalka Israel ayaa ilaa imika aan si toos ah u qiran inay diyaaradaheedu weerareen goobtaas in kasta oo shaki laga muujiyey ujeeddadii ay ka lahayd.
Sidoo kale, Ku-xigeenka Taliyaha Guud ee Ciidamada Qalabka-sida ee dalka IRAN, Sarreeye-guuto Masoud Jazayeri ayaa cambaareeyey weerarkan maalintii Arbacada ee todobaadkii hore lagu qaaday Xarun lagu farsameeyo Hubka Kiimikada ah, kaas oo la rumaysan yahay in diyaaradaha Israel Duqeyn u geysteen.
Brigadier-General Masoud Jazayeri oo shalay u warramay telefishanka dalkaas laga leeyahay ee Press Tv, waxa uu sheegay inay jawaab deg-deg heli doonto Israel.
“Jawaabta Suuriya ka bixiso gar-darradii kaga timi maamulka Sahnuuniyadda, waxa ay ku ridi doontaa Jaah-wareer,” ayuu yidhi Sarkaalkani, waxaanu intaas ku daray, “Maraykanka iyo Israel way ogyihiin in isku-fillaanshiyahay Qaranka Suuriya aanu dhammaan doonin.”
Muddadii 22-ka bilood ahayd ee dagaalka sokeeye ka socday Suuriya, hoggaamiyeyaasha dawladda Israel waxa ay in badan ku cel-celiyeen walaac ay ka qabaan in hubka dalkaasi gacanta u galo ururka Xisbullah oo cadaawadi ka dhaxayso.
Israel waxa ay sannaddadii u dambeeyey ku eedaynaysay madaxweyne Assad iyo Iran inay dhinaca Milatariga ka taageeraan ururka Xisbullah oo sannadkii 2006 milatariga Israel la galay dagaal socday muddo bil ah.
SOMALILANDPOST.NET
