Hargeysa (SLpost) – Suldaan Xuseen Cabdi X. Cabdilaahi oo ka mid ah madaxdhaqameedka magaaladda Hargeysa, ayaa sheegay in garoonka kubbadda cagta ee Hargeysa Stadium uu yahay hanti qaran oo mulkiyadiisa ay leedahay dawladda Somaliland.
Waxa kale oo uu Suldaanku sheegay in aanay jirin cid is-hortaagi karta in tartanka ciyaaraha gobollada ee 15-ka bishan ka furmi doona garoonka Hargeysa Stadium, waxaanu u soo jeediyay shakhsiyaad uu tilmaamay inay soo abaabuleen haween iyo dhallinyaro sheegay in aan tartankaasi lagu qaban karin garoonka Hargeysa Stadium. “Waxaan leeyahay raga soo diraya ee soo abaabulay haweenkii xalay (habeen hore) ka caytamayay saxaafada isla markaana canbaaraynayay qaar ka mid ah madaxdhaqameedka iyo Salaadiinta beesha degan Degmada Axmed Dhagax.
Waxaan qabaa in aflagaadadii ay haweenku noo jeediyeen aanay ahayn wax na qabta, waxaan leeyahay raga haweenka soo abaabulay idinku dibeda u soo baxa oo is-cadeeya, anagu waanu ku khasbanahay in aanu xukuumada iyo madaxtooyada kala shaqayno ilaalinta nabadgalyada oo ah hantida ugu qaalisan ee qaran ahaan aynu haysano, mar walbana waanu tagaynaa madaxtooyada iyo xafiisyada dawladaba,” ayuu yidhi Suldaan Xuseen oo caawa u warmayay qaar ka mid ah warbaahinta.
Suldaanku waxa uu sheegay inay soo dhawaynayaan in tartanka ciyaaraha Gobolada uu ka qabsoomo garoonka Hargeysa Stadium, isaga oo arrintaa ka hadlayana waxa uu yidhi “dad kale garoonka Hargeysa Stadium tartan laguma qaban karo waa dad leh Somaliland ma jirto, dawlada iyo qarankuna taas kama yeelayo, raga haweenka soo abaabulayana waxaan leeyahay idinku soo badheedha oo is-cadeeya.”
Suldaan Xuseen oo hadalkiisa sii watana wuxuu yidhi “ sidoo kale dadka leh Degmada Axmed Dhagax cashuur lagama qaadi karo, oo dawladi ma iman karto, iyana way iska hadleen, Maayarka iyo Maayar ku xigeenka Caasimaduna waxay cashuuraha uga guranayaan degmada Axmed Dhagax sidii ay cashuurta uga qaadi jireen Maayarkii iyo Maayar ku xigeenkii hore.”
“Ururka Xaqsoor iyo reernimadu waa laba kala duwan, ururkaana waxaa hogaan u ah nin mudakar ah oo dalka iyo dadkuba xushmada u hayaan, waxaan u soo jeedinayaa dadka fowdada wada in aanay sumcadda ka dilin mujaahid Xasan Ciise Jaamac,” ayuu yidhi Suldaan Xuseen.
Sidoo kale, wakiilka Boqorka Beesha Muuse Abokor, Cabdi Haybe Khayre ayaa isaguna si adag u naqdiyay hadalkii ka soo yeedhay xubno ka mid ah haweenka ururka Xaqsoor, oo uu tilmaamay in ay u hadleen si caadifad leh oo bulshada Degmada Axmed Dhagaxna dheg-xumo u soo jiidaysa.
SOMALILANDPOST.NET
