Mooshinkaa goluhu laalayee, guuxa badan keenay
Ee laysu gabangaabsadee, goohu dami waayey
Xukuumaadda go’aankeeda waa gaylan iyo boobe
gurrac iyo maroor bay rabaan inay goostaane
Dood loo garaabaa ka dheer ina gahayrowe
Goolaaftankoodaan arkaa waa galoof madhane
Hadba waxay la gabargaalayaan waa gaddaan-dhabade
Gumariyo wixii maal hadhay sii guntanaayen
War-gaysyada waxay soo dhigeen weedho gaanjaba
Qof garaadli’ wuu diidayaa gababaxdoodaase
Khadarow guddoon eelahaan kuu galgaal bixine
Gorfayntayda maqal waadigii guurtida ahee
Bal geddooda eeg talo adduun gunuxsi weeyaane
“Gacansade Muwaadin hadduu hawsha gudanaayo
Sharci gaasiraayaa ma jiro ama ka giigaaye
Hantidii ma guurto ah hadday dani gayeysiiso
In la gado ijaar laga guriyo siismo galactooyo
Gaddii ay rabanaba xeerku wuu noo gabbaan yahaye”
Saleebaan goonjada qabee gumaca liishaamay
Guruubkuu adeegsada bad bay maanta galiyeene
Geesna uma fayooboo dullaa guudka loo sudhaye
Bal gandoodka eeg ceebihiyo fool xumada gaadhay.
Mawliid Aadan