Hargeys (SLpost)- Waxa maanta magaalada Hargeysa lagaga dhawaaqay Gole loogu magac-daray ‘Golaha Wada-tashiga iyo Toosinta Qaranka’ kaas oo ay ku bahoobeen xubno mucaarad ah oo isugu jira Siyaasiyiin, Aqoonyahan, Mujaahidiin iyo Shakhsiyaad kale.
Golahan oo ay xubno ka yihiin siyaasiyiin ka tirsan Xisbiyada mucaaradka iyo Ururradii ku hadhay doorashadii goleyaasha Deegaanka ee sannadkii hore dalka ka qabsoontay, ayaa war-saxaafadeed lagu shaaciyey ujeeddada aasaaskiisa lagu sheegay ka dib markii ay u cuntami wayday nidaamka hoggaamineed ee xukuumadda Kulmiye ku hagayso siyaasadda dalka iyo Maamulka gudahaba.
War-saxaafadeed xambaarsan ujeeddada loo aasaasay Golahan iyo Waxyaabaha ay daliishanayaan, ayaa u dhignaa sidan: “Marka hore waxa aan ummadda reer Somaliland meel kasta oo ay joogto leeyahay Ramadaan Kariim. Bishan bisheedana ku gaadha badhaadhe iyo barwaaqo.
Intaasi ka dib, waxa farxad weyn ii ah anigga oo ah Ibraahim Cabdillaahi Xuseen (Dhegoweyne) oo ah Afhayeenka Golaha Madaxbanaan ee Wadatashiga iyo Toosinta Qaranka in maanta oo ah Arbaca, 10 July, 2013. Ku dhawaaqno oo shaacino jiritaanka golahan cusub iyo baahiyhii keenay abuuritaankeeda iyo ujeedooyinkeeda.
Ka dibna markii aanu aragnay:
- Xalaada guud ee dalku maraayo
- Gooni isutaagii iyo qadayadii madaxbanaanida Somaliland oo madmadow la geliyay, isla markaasna dalkii go’doon laga geliyay beesha caalamka.
- Balanqaadyadii ay xukuumadda ku gashay xilligii ololaha doorashada madaxtooyadda ee 2010 oo aan intoodii badnayd la fulin ama la hirgelin.
- Eexdii, qabyaaladdii, musuqmaasuqii iyo hantiboobkii oo maraaya meel aan hore loo arag abid.
- Hantidii ummada iyo awoodii dowladnimo oo loo isticmaalaayo in lagu furfuro laguna kala qeybiyo midnimadda shacabka SomalilandL laguna cabudhiyo saxaafadda madaxabanaan iyo Xisbiyaddii qaranka.
- Taladii dalka oo gacanta u gashay shakhsiyaad aan loo igman oo dano gaar ah leh oo runtii aan dalka iyo dadka toona midna u tudheynin.
- Sida ay isku-milmeen xukuumaddii, golayashaashii sharci dejinta, iyo garsoorkii qaranka halkaas oo ay ku luntay isku-dheelitirkii awoodeed ee dalka
- Aragnay wax ka qabasho la’aanta cabashooyinka beelaha iyo weliba isku-dhacyadda dhexmara.
- Niyadjabka, shaqo la’aanta, quusta, rajo xumada, iyo tahriibta ku habsatay ummadii SL guud ahaana, gaar ahaana dhallinyaraddii lafdhabarka u ahayd dalkan.
- Sida dastuurkii iyo shuruucdii dalkani lahaa loogu tumanaayo.
- Wadatashigii & isku tanaasulkii ay Somaliland ku soo caano maashay intii ay jirtay oo loo bedelay in aan la isku joojin.
- Beelihii darafyadda oo ka maqan dhadhaaradii taladda dalka iyo awood qeybsigii.
- Caadaalad daradii oo si weyn ugu baahday dhamaan dalkii oo dhan iyo go’aanadii maxkamadaha oo aan la fuluneynin.
- Ilihii dhaqaale ama dakhliga sida dekadda, haamaha shidaalka, macjarkii, hey’adii wadooyinka, dayactirka (levy), lacagtii gurmadka, 2% loo qoondeeyay horumarka goboladda bariga oo si toos loo hoos geeyay madaxtooyadda iyada oo dano gaar ah loo isticmaalo.
- Dhaqaalaha ka soo gala dalka kheyraadka dabeeciga ah sida shidaadlka, macdanta, kalluunka,iwm. oo si gaar ah loogu takri falaayo heshiisyadoodana aan la soo marin baarlamaanka
- Dhimashadii, dhaawicii, dildilaaci, riiqdii, qeybsanaatii, qabyaaladii ay inaga tagtay doorashadii golaha degaanka (28/11/2012) ee xukuumada SL musuqmaasuqday.
Haddaba, isku soo wada duuboo markii aanu araganay in dalka halis ku jiro oo cagta saaray tubtii ama dhabihii ay dowladuhu ku burburi jireen ayaa wada tashi dheer oo ka dhacay dalka gudihiisa iyo debediisaba lagamamaarmaan noqotay in loo midoobo sidii loo badbaadin lahaa jiritaanka Qaranimadda JSL. Sidaasi awgeed waxa abuurmay gole madaxbanaan oo la magac baxay ‘GOLAHA MADAXBANAAN EE WADATASHIGA IYO TOOSINTA QARANKA’. Waxa la isla gartay in sida ugu dhakhsiyaha badan leh loo qabto Dood Cilmiyeed lagu lafo guraayo laguna dersaayo xal u helida dhibaatooyinka iyo caqabadaha faraha badan ee inna horyaala si loo helo Midnimo Qaran.
Xubnaha Golahani ka kooban yahay
1. Afhayeenka golaha Madaxa banana ee wada tashiga iyo toosinta qaranka Ibraahim Cabdilaahi Xuseen Dhaga weyne
2. Gudoomiyaha Ururki Xaqsoor Xasan Ciise Jaamac
3. Maxamed Xaashi Cilmi
4. Xildhibaan Cali Yuusuf Koore
5. Prof. Siciid Cabdi Caamir
6. Axmed Maxamed
7. Guddomiyaha Xisbiga Ucid Faysal Cali Waraabe
8. Maxamed Cismaan Yuusuf Isxal
9. Jaamac Xaashi Maxamuud
10. Cali maxamuud Xasan
11. Axmed Ibraahiim Xaaji xasan Iyo Qaar kale oo badan oo aan halkan lagu soo koobi Karin kana Kooban Siyaasiyiin, Aqoonyahano iyo Xubno kale oo dalka Miisan Culus ku leh.”
