Hargeysa (SLpost)- Dr Edna Aadan Ismaaciil, ayaa faahfaahin ka bixiyey halis uu leeyahay iyo siyaabaha fudud ee lagu kala qaadi karo kuna fidi karo Cudurka Dilaaga ah ee COVID-19 oo uu sababo Caabuqa CoronaVirus oo xilligan faro baas ku haya dalalka Adduunka oo la tacaalaya xakamayntiisa.
Guddoomiyaha ahna Aasaasaha Cusbitaalka Hooyada iyo Dhallaanka ee Edna Aadan Maternity Hospital ee magaalada Hargeysa, waxa ay sharraxaad faahfaahsan ka bixiyey dabeecadaha uu leeyahay caabuqa CoronaVirus iyo tilmaamaha ugu habboon ee lagu xakamayn karo fiditaankiisa isla markaana lagula dagaalami karo.
Dr Edna oo warbaahinta dalka qaarkood kula hadashay magaalada Hargeysa maanta, waxa ay sheegtay in caabuqa CoronaVirus leeyahay astaamaha xannuunka Hargabka balse uu yahay cudur dilaa ah oo ay si gaar ah ugu nugul yihiin Dadka Qaba xannuunada qaarkood iyo dadka da’doodu weyn tahay ee jilicdasan.
“Waxa maanta dunida ka jira cudur ka dillaacay oo aynaan hore u arki jirin. Cudurka CoronaVirus waa cudur u eg hargabka kase weyn, waa cudur dilaa ah oo waliba ay u nugul yihiin dadka macaanka Qaba, dadka dhiig-karka qaba, dadka sambabadu bukaan, dadka Oof-wareen ka soo kacay iyo dadka da’da ah”, Sidaas ayay tidhi Dr Edna.
Wasiirkii hore ee Arrimaha Dibadda Somaliland oo hadalkeeda sii wadatay, waxa ay intaas ku dartay oo tidhi, “Waxaan doonayaa inaan aad iyo aad ugu mahad-naqo madaxweynaha Somaliland oo go’aan adag ka qaatay la-dagaalanka iyo ka-hortagga cudurkan dilaaga ah. Siyaabo badan ayaynu ula soo dagaalannay waxyaabo badan oo aynu soo aragnay hadday tahay maska iyo bahalka, laakiin cudurkan Koronafayraska maaha mid aynu oodda ka dheeraysan karno, godna ka geli karno, hawada ayuu la socdaa, sida Hargabka loo kala qaado ayaa loo kala qaadaa”.
Marwo Edna Aadan oo sharraxaysay tallaabooyinka lagula dagaalami karo cudurkan, waxa ay xustay, “Cudurkan waxa lagu dagaalaamaa waa nadaafad, CoronaVirus-ku kulaylka ama qorraxda ma jecla, sidaa awgeed waa in qorraxda lagu leydhiiyo Gogosha, bustayaasha, galalka barkimada ee habeenkii lagu seexdo, si joogto ahbaa loo maydhaa. Haddii qofku qabo xannuunkan Ilmahiisa yar ayuu qaadsiin karaa marka uu kula soo seexdo gogosha”, sidaas ayay tidhi Marwo Edna Aadan oo marka laga yimaaddo masuuliyadda maamul ee cusbitaalka hooyada iyo Dhallaanka, haddana xilligan ku magacaaban Ergayga Gaarka ah ee Jamhuuriyadda Somaliland ugu magacaaban Wada-hadallada Soomaaliya.
Dr Edna Aadan Ismaaciil, waxa ay xustay Waxyaabo Daawo u ah Caabuqa CoronaVirus, “CoronaVirus ma jecla wixii dhannaan sida Liinta waa dawo, hadduu Virus-ku afkaaga galay, way dilaysaa. Khalku wuu dilayaa, Saabuuntu way dilaysaa, cadarka kulul wuxuu leeyahay Alcohol sida Furcadda iyo Koloniyaha, wuu dilayaa viruska”. Sidaas ayey tidhi Dr Edna Aadan Ismaaciil oo ah Aasaasaha Cusbitaalka Hooyada iyo Dhallaan ee Edna Aadan Maternity Hospital ee magaalada Hargeysa.
Somalilandpost.net
editor@somalilandpost.net
