Hargeysa (SLpost)- Xildhibaan Axmed Muuse Obsiiye oo ah gudoomiyaha guddi hoosaadka siyaasadda nabadgelyada iyo difaaca golaha guurtida ayaa waxa uu guud ahaan dhalinyarada Somaliland usoo jeediyey in ay dalkooda aaminaan isla markaana ay ka shaqeeyaan horumarkiisa. Xildhibaanku waxa uu sidaa ka sheegay fadhi ay maanta yeesheen golaha guurtidu oo uu shirgudoominaayay gudoomiye ku-xigeenka kopwaad ee golahaasi mudane Siciid Jaamac Cali.
Isla fadhigan ayaa xildhibaanadii ku sugnaa waxa loo qaybiyay xeerka booliska Somaliland xeer No.63. 2013, si ay u soo naaqishaan ugana soo baaraan degaan.
Xildhibaan Axmed Muuse isagoo la hadlayay dhalinyarada ku dhaqan guud ahaan Somaliland ayaa waxa uu yidhi “Dhalinyarada waxaan leeyahay dalka idinkaa u soo kacaaya waxna u baranaaya, anagu nabadgelyadii iyo maamulkii iyo dalkii oo salka loo dhigay intaba idinku sinay ee hayska burburinina.”
Gudoomiyaha guddi hoosaadka siyaasada nabad-gelyada iyo difaaca golaha guurtida xildhibaan Axmed Muuse waxa kale oo warbixintaas uu ka hor jeediyay xildhibaanada guurtida kaga hadlay halka ay marayso xaalada nabadgelyo ee guud ahaan dalku, isagoo arrintaa ka hadlayana waxa uu yidhi “Dalkeenu maalin-ba maalinta ka dambaysa xagga nabadgelyada wuu ka soo wanaagsanaanayaa, dhul badan oo aan markii hore gacanteena ku jirina ay soo xaroonayaan. Markaa waxaynu u baahanahay in shaqada la kordhiyo. Xukumaduna gacan la siiyo.”
Muadane Axmed waxa uu ganacsatada ugu baaqay in ay fur-furaan ganacsiga si dhalinyaradu shaqo abuur u hesho, isagoo arrintaa ka hadlayana waxa uu yidhi “Marka aynu eegno dhaqaalaha dalka ma xuma miisaaniyadu dawladana waxaad moodaa in ay dhankeedii dabooshay, marka aynu eegno dhanka ganacsatada waxaad moodaa in cidhiidhi ka jiro, waxaana loo baahan yahay in dhaqaalaha la fur-furo si dhalin yarada loogu helo shaqo abuur.”
Xildhibaanku mar uu ka hadlaayay kulan ay la yeesheen masuuliyiinta qaabilsan amaanka, ayaa waxa uu yidhi “Markii aanu la kulanay masuuliyiinta laamaha amaanka dawlada, waxyaabihii ay nagla hadleed waxa ka mid ahaa in ay dhibtaato ka jirto dhalinyarada habeenkii bulshada dhibaateeya. Anaguna doorkayagii waanu ka qaadanay oo shir jaraa’id ayaanu ka qabanay oo waxaanu bulshada u sheegnay in layska kaashado sidii arrimahaas waxa looga qanan lahaa, gacana loo siin lahaa ciidamada amaanka.”
Gudoomiyaha guddidani waxa kale oo sheegay in ay kulamo kala duwan la yeesheen madaxda sare ee laamaha amaanka ayna si fiican iskaga waraysteen guud ahaan halka ay marayaan arrimaha amaanka dalka. Guddidani waxay ku baaqeen in la sii xoojiyo wada shaqaynta ka dhaxaysa laamaha amaanka dawladda iyo golaha guurtida oo ah gole shaqadiisu tahay diinta, nabadgelyada iyo dhaqanka.
Guddi hoosaadka siyaasada nabadgelyada iyo difaaca golaha guurtidu waxay bulshada Somaliland ugu baaqeen in ay ilaashadaan nabada iyo wada jirkooda. Si aanu hakad u galin hanaanka geedi socod ee horumarka Somaliland.
Halkan hoos ka dhageyso
Somalilandpost.net
Hargeysa
