Hargeysa (SLpost)- Madaxweyne Ku-xigeenka Somaliland ahna Ku-simaha Madaxweynaha Cabdiraxman Cabdilaahi Saylici ayaa Maanta ka Qayb galay Sanad Guuradii 20 ee Asaaska Ciidamada Qaranka Jamhuuriyadda Somaliland oo lagu xusay jewi ka geddisan munaasibadihii ka horreeyey.
Munaasibad si weyn loo soo agaasimay ,ayaa lagu qabtay Xarunta Taliska Guud ee Ciidanka Qaranka Somaliland, taas oo ay ka soo qayb qaleen Madaxweyne ku-xigeenka Somaliland Cabdiraxmaan Cabdilaahi Ismaaciil ahan ku simaha Madaxweynaha,Guddoomiyaha golaha Wakiiladda Somaliland ahna Guddoomiyaha Xisbiga Mucaaridka ah ee Waddani, Wasiir ku-xigeenka Cabdi Daahir Camuud, taliyeyaasha ciidammada kala duwan ee dalka Madaxda Xisbiyada,xildhibaanno iyo marti sharaf kale.
Taliyaha Ciidanka Qaran Ismaciil Maxamed shaqale oo xafladaasi hadal ka jeediyey ayaa sheegay in munaasibadani tahay Munaasibad lagu xusayo asaaska ciidanka qaranka jamhuuriyadda Somaliland oo dhidibada loo tagay 1994-kii, waxa kale oo uu ka halday heerarkii kala duwan ee ay soo mareen cidiimada qaranku, isaga oo tilmaamay in haatan marayaan meel aad u fiican oo shacabka somaliland kalsooni ku qabaan in ciidankoodu difaaco xududaha dalkooda.
Wasiir Ku-xigeenka gaashandhiga Cabdi Daahir Cammuud oo isaguna halkaasi ka hadlay ayaa tilmaamay in ciidanka qaranku ay u diyariyeen tababaro faro badan oo loo kala diray wadamada jaarka iyo kuwa Yurub.
Madaxweyne Ku-xigeenka Jamhuuriyadda Somaliland oo gunaanadkii munaasibadda ciidanka Qaranka ka hadlay ayaa uhu horrayn fariin u diray maamul goboleedka Puntland waxaanu sheegay in loo baahan yahay inay ilaaliyaan jaarnimada iyo daris wanaagga.
“Ciidanka Qaranka Waxaanu u dhisannay maaha inaannu cid ku cabudhino iyo inaanu cid ku duullo midna markaa walaalahayaga aanu jaarka nahay ee reer Puntland waxaanu leenahay ixtiraama jaarnimada iyo daris wannaagga,gobolada bariga Somaliland uma baahna qori iyo xabad laakiin waxay u baahan yihiin goboladaasi horumar iyo wax qabad aanu diyaar ula nahay,” ayuu yidhi Madaxweyne ku-xigeenka Somaliland Cabdiraxmaan Cabdilaahi Ismaaciil(Saylici).
Waxaa kaloo uu hambalyo u diray dhamaan ciidanka Qaranka Somaliland oo uu u rejeeyay inay sannadkan sannadkiisana ku gaadhaan badhaadhe iyo nabad qab.
Kooxda ciidanka Qaranka ee Gaashaan ayaa munaasibadda Ciidanka Qaranka Somaliland ku soo bandhigay riwaayad aad u soo jiidatay masuuliyiintii daawanayay isla markaana ka turjumaysay wacyiga dalku marayo iyo halka loo socdo kana digaysay, qabyaalada iyo wax qabsi la,aanta waxaanay aad ugu dheeraatay Riwaayadda ay maanta soo bandhigeen kooxda Gaashaan.
Ciidamada Milatariga ee Somaliland noocyadooda kala duwan ayaa munaasibadan ugu dabaal-degaya horumar iyadoo sanadkan ay ku xusayaan iyada oo la siiyay derajooyinkii ciidanimo 10 kun oo askari oo ka kala tirsan qeybaha kala duwan ee ciidamada, kuwaasi oo qaatay derejooyinka u dhexeeya Alifle illaa Sareeye Gaas.
Somalilandpost.net
