“Markii Riiggii dhulka lagu taagay soo daayey biyo xareed ah ayaad durba arkaysay shimbiro meel fog kasoo dulay oo dul heehaabaya deegaanka dushiisa taasi oo cadayn u ah bilowga nolol haraad beel ah waxaanay indhahaagu qabanayeen xoolo meel fog kasoo halacsaday biyaha dhulka kasoo boodaya.”
Hargeysa (SLpost)- Deegaaanka Waddo-Makaahiil oo ka tirsan Degmada Faroweyne ee gobolka Maroodijeex, ayaa markii u horeysay laga hirgeliyey Ceel-biyood ay baahi weyn u qabaan Dadka iyo Duunyada ku dhaqan Waddo-Makaahiil oo ku taala xuduudka u dhexeeya Somaliland iyo Itoobiya.
Wasiirro ka tirsan xukuumadda, ayaa maanta u tagay deegaankaas furitaanka Ceel-biyoodka oo madaxweyne Siilaanyo u ballan-qaaday dhowr todobaad ka hor uu ku maray socdaalkiisii Buur iyo Bannaan loogu magac-daray, kaas oo uu ku maray deegaannno ka tirsan gobollada dalka.
Weftiga Wasiirrada ee maanta ka qayb-galay munaasibadda waxa ka mid ahaa Wasiirrada Maaliyadda iyo Waxbarashada, Cabdicasiis Samaale iyo Samsam Cabdi Aadan oo deegaanka ka soo jeeda, Wasiirka Madaxtooyada Xirsi Cali Xaaji Xasan iyo Wasiirka Kheyraadka Md. Xuseen Axmed Cabdile oo fulinta mashruuca ku guulaysay kaddib markii wasaaraddiisu la kaashatay hay’adaha Gargaarka ee dalka ka hawl-gala.
Wasiirka Madaxtooyada Xirsi Cali Xaaji Xasan, ayaa isagu ka dareen-celiyey Ceel-biyoodka loo hirgeliyey deegaankaas, isaga oo qoraal uu ku baahiyey bogga uu ku leeyahay Internetka ee Guusha.com ku sawiray jewigii deegaanka iyo goobta Ceel-biyoodka laga sameeyey uu ku arkayey intii ay sugnaayeen.
Qoraalka Wasiirku kaga dareen-celiyey guusha laga gaadhay ceel-biyoodka, waxa ka mid ahaa, “Waxa aan ku Faraxsanahay in Maanta markii uugu horaysay Deegaanka Waddo Makaahiil lagu guulaystay in ay helaan Biyo Macaan.
Ceel biyoodkan maanta laga gaadhay biyaha macaan ayaa balanqadkiisa uu sameeyey Madaxweynaha Jamhuuriyadda Somaliland socdaalkii (Buur iyo Banaan) ee uu dhawaan kusoo maray in badan oo kamida degmooyinka iyo tuulooyinka dalka.
Waa illaahay mahadii in balanqaadkii Madaxweynaha durba deegaankaasi helay oo ay maantaba haystaan waxqabadkii loo balanqaaday ee loo dhagax dhigay maalmo kooban ka hor,” sidaas ayuu Wasiirka madaxtooyada Somaliland.
Isaga oo sawirayey jewigii goobta Ceelka laga dalooliyey, waxa uu yidhi, “Markii Riigii dhulka lagu taagay soo daayey biyo xareed ah ayaad durba arkaysay shimbiro meel fog kasoo dulay oo dul heehaabaya deegaanka dushiisa taasi oo cadayn u ah bilowga nolol haraad beel ah waxaanay indhahaagu qabanayeen xoolo meel fog kasoo halacsaday biyaha dhulka kasoo boodaya.”
“Waan ugu hambalyeynayaa deegaankaas biyaha macaan ee ay heleen sidoo kale waxaan ku bogaadinayaa saxiibkay Wasiirka Khayraadka Biyaha tacabka badan ee uu u galay in uu balanqadkii Madaxweynaha u turjumo wax qabad muuqda.
Waa dhab oo biyuhu waa aasaaska nolosha waana baahida koobaad ee noolaha, waxaanan ku dedaalaynaa ka xukuumad ahaan in deegaan walba ka haqab beelo baahida biyaha Insha Allahu Illaahayna uu inoo sahli in nimcadiisa Biyuhu dhamaanteen ina wada gaadho,” sidaas ayuu yidhi Wasiir Xirsi Cali Xaaji Xasan.
SOMALILANDPOST.NET
editor at Somalilandpost.net
