Ka dib markii dhowaan waxgaradka Buuhoodle iyo Dawlada Somaliland wada gaadheen heshiis lagu soo afjarayey Colaad heerka ay gaadhay ay ahayd mid aan la rajaynayn ayaa hadda waxaa guud ahaan deegaanka Buuhoodle ka hirgashay nabadgelyo taam ah oo ilaahay lagu mahadiyo.
Iyadoo hadaba la wada ogyahay Colaadu inay si kediso ah u timaado, nabadgelyaduna u baahan tahay wakhti si ay u dhaqan gasho ayaa hadda waxaa muuqata in nabadii si rasmi ah uga hirgashay Deegaanka Buuhoodle isla markaana ay dhibicda Raxmadda dayreed ee sanadku si xoog leh ugu hoortay deegaanadii xiligii Colaadda ugu xumaa.
Nabadda deegaankaasi waxay hadda tahay mid ay yar iyo weyn, rag iyo Dumar hareeraha ka taagan yihiin, mas’uuliyadda ugu weyn ee adkaynteedana ay leedahay dawladda Somaliland oo labo qodob oo ka mid ah Go’aamadii ka soo baxay kulamadii Marathon-ka ahaa ee todobaadkan ay yeesheen Golaha Xukuumadu ka hadlayeen adkaynta nabadgelyada Sool, sanaag Bari iyo Buuhoodle oo mararka qaarkood loogu yeedho Shaxda, halka ay dadweynaha iyo ardaayada kala duwan ee reer Buuhoodle wada shaqayn labo dhinac ah ka leeyihiin adkaynta nabadaasi.
Sida ay xukuumadda Somaliland caddaysay adkaynta nabadgelyada ka hirgashay Buuhoodle iyo dib u eegista tabashooyinka guud ahaan beelaha Sool, Sanaag bari iyo Buuhoodle waxaa lagama maarmaan u ah talaabooyinka ay u horayso hirgelinta barnaamijyo horumarineed oo bulshada iyo Deegaankaba ah, taasoo ku imanaysa isu tanaasul, turxaan bixin, talo wadaag, isku tiirsanaan iyo in la wada sunto hanaanka loo marayo xaqiijinta himilada iyo hadafka la wada tiigsanayo.
Digtoonaanta laga muujinayo shaqsiyaadka nabadda ku xanuunsada oo laga yaabo in qaarkood ku sugan yihiin Caasimadda Hargaysa kana soo jeedaan deegaanada aynu kor ku soo xusnay kuwaasoo beryahan dambe caadaystay inay warbaahinta ku xoqaan qoraalo been abuur ah oo ay ku xaqirayaan waxgaradkii dhinacyada kala duwan ahaa ee isu taagay hirgelinta nabadgelyada maanta buuhodle lagaga naaloonayo.
Gudidii dhinaca Gudaha Buuhoodle nabadda ugu istaagtay oo uu hogaaminayay Dr Saleebaan Ciise Axmed Xaglo toosiye oo hadda loogu yeedho Nabad Toosiye oo ah aqoonyahankii ku guulaystay 1995-kii abaalmarinta sanadlaha ah ee caalamiga ah ee ay bixiso hay’adda UNHCR laguna maamuuso qofka ugu mudan dadka dalalkooda dibada kaga nool, ka dib markii uu wax weyn ka qabtay xaaladda waxbarasho ee dadkii soomaalida ahaa ee u qaxay wadamada deriska isla markaana u abuuray Dugsiyo ay wax ku bartaan, Muddo sanado ahna gudoominayey Ururka ay ku midaysan yihiin jaaliyadda afrikada bari ee waqooyiga Ameerika, ka hor intii aanu dalka dib ugu soo noqonin, Todobaadkana caasimadda Hargaysa loogu qabatay xaflad ay ku maamuuseen labaataneeyo dhalinyaro ah oo ay isku School ahaayeen badankooduna ahaa kuwii ay fasalka wada dhiganayeen mudada 12 sano ah ayaa sida uu uga midho dhaliyey nabadda Buuhoodle isagoo kaashanaya waxgaradka deegaanada Buuhoodle waxay ahayd mid laga wada sugayey isagoo ku dhaqaaqay waqtigii Munaasabka ku ahaa.
W/Q Xuseen Aadan Yuusuf (Kurdi)
Xuskurdi@gmail.com
4491178
