Hargeysa (SLpost)- Prof Axmed Ismaaciil Samatar oo ka mid ah Aqoonyahannada Somaliland, muddo badanna wax ka dhigi jiray jaamacadaha Maraykanka, ayaa la filayaa inuu Berri ka soo dego Garoonka Diyaaradaha ee magaalada Berbera.
Prof Samatar oo ka mid ah shakhsiyaadka u hanqal-taaga mabda’a Somaliweyn, haseyeeshee saluug ka muujiyey nidaamka saami-qaybsiga Dawladda Soomaaliya, ka dib markii uu u tartamaya jagada madaxtinimada Muqdisho, ayaa maalmihii u dambeeyey magaalooyinka Hargeysa iyo Boorama si weyn looga dareemayey dhaq-dhaqaaqyo loogu ololeynayo soo-dhawayntiisa, waxaana jidadka magaalooyinkaas lagu dhejiyey boodhadh waaweyn oo lagu xardhay sawirkiisa iyo hal-kudhegyo ay ka mid yihiin ‘Ku soo dhawaw dalkaagii Hooyo’, iyada oo xukuumadda Somaliland-na guddi heer wasiir ah u magacowday soo dhaweyntiisa.
Soo-dhaweynta Axmed Ismaaciil Samatar, ayaa waxa si wada-jir ah isaga kaashaday Guddi aqoonyahanno ah oo Dalka ku sugan iyo guddida Xukuumaddu u magacowday Qaabilaaddiisa, sida uu sheegay wasiirka Kalluumaysiga iyo Kheyraadka Badda oo u warramay warbaahinta dawladda.
Geeljire waxa uu sheegay in xukuumaddu casuumad u fidisay Prof Samatar, isla markaan aay soo-dhawayntiisa u qorsheeyeen inay noqoto Mid Hab-maamuuskeedu aad u sarreeyo.
“Axmed Ismaaciil Samatar waxa uu ka soo degayaa garoonka diyaaradaha ee magaalada Berbera, waxaanay xukuumada ugu talogashay inay ku soo dhawayso baratagool iyo hab maamuus sare, maadaama oo ay xukuumadu casuuntay,” ayuu yidhi Wasiir Geeljire, waxaanu sheegay inay jiraan guddi aqoonyahanno ah oo isku xil-saartay soo-dhawaynta Aqoonyahan Samatar.
Wasiir Geeljire oo xubin ka ah guddida Xukuumadda ee qaabilsan soo-dhawaynta Prof Samatar, wax faahfaahin ah kamuu bixin ujeeddada Socdaalka uu wakhtigan dalka ku imanayo, haseyeeshee Axmed Ismaaciil oo dhowaan warbaahinta u warramay, waxa uu sheegay inuu booqasho ku tagayo Somaliland isla markaana uu socdaal ku mari doono gobollada dalka, kulamana la yeelan doono bulshada ku nool deegaamo ka mid ah dalka.
Isbeddel ku yimi mabada’a uu Siyaasigan hore u aaminsanaa oo salka ku haya waayo-aragnimo uu ka soo kasbaday farqiga u dhexeeya Somaliland iyo Somalia, ka dib markii uu guul-darro kala kulmay doorashadii madaxtinimada ee sannadkii hore lagu dhisay dawladda Muqdisho, haseyeeshee uu markii dambe ka mid noqday xildhibaannada Baarlamanka Dalkaas oo uu markii dambe shaaciyey inuu iska casilay xubnimadiisa markii uu muddo dhowr bilood ah ku sugnaa magaalada Muqdisho.
Prof Samatar oo muddadii ka dambaysay is-casiladdiisa xubinimada Baarlamanka Somaliya uu dhowr jeer ka hadlay sababta ku kalliftay inuu ka laabto mabda’iisii Somaliweyn iyo sababta uu wakhtigan xoogga u saarayo inuu Dadkiisa iyo Dalka uu ka
soo jeedo ee Somaliland taageero u muujiyo, haddana waxa uu 20-kii sanno ee Somaliland jirtay aaminsanaa feker lid ku ah qaranimada Somaliland, isaga oo ku doodi jiray inay dib u dhismi doonto midnimadii Soomaaliya.
Si kastaba ha ahaatee, marka laga yimaadda saluugga uu ka muujiyey nidaamka saami-qaybsiga Soomaaliya iyo taageerada uu wakhtigan u muujiyey Somlaliland iyo horumarkeeda, haddana lama xaqiijin karo inuu ka tanaasulay mabda’a Somaliweyn, lamina saadaalin karo kaalinta uu ka qaadan karo masraxa siyaasadeed ee Somaliland, in kasta oo isbeddelka mabda’iisu guul u yahay Somaliland iyo midnimadeeda maadaama uu yahay ruug-caddaa siyaasi ah oo si weyn looga yaqaano dhulka Soomalidu degto iyo qaybo badan ka mid ah bulshada Caalamka.
SOMALILANDPOST.NET
