Riyadh, (SLpost)- Ninkii isla lahaa dhaxalka boqortooyada Sucuudiga, Amiir Suldaan bin Cabdicasiis ayaa maanta ku geeriooday dalka Maraykanka oo xannuun lagaga dawaynayey.
Geerida Amiir Suldaan, oo da’diisu ahayd 85 sanno isla markaana ay dhanka aabo ka walaalo yihiin boqorka Sucuudiga Cabdalla, ayaa dhalisay in su’aalo la iska weydiiyey cidda dhaxaltooyada yeelanaysa.
Waxa la sheegayaa inuu Amiirku ku geeriyooday cusbitaal ku yaala magaalada New York, isla markaana lagu wado in maalinta Salaasada lagu aaso magaalada Riyadh.
Kaalintiisi Hoggaanka Boqortooyada
Amiir Suldaan oo soo qabtay xilka ku-xigeenka Raysalwasaaraha boqortooyada Sucuudiga, ayaa sidoo kale soo qabtay xilka wasiirka gaashaan-dhigga iyo wasiirka gaadiidka cirka muddo afartameeyo sanno ah.
Dhanka kale, xoghayaha arrimaha dibadda Maraykanka Hillary Clinton ayaa Marxuumka ku tilmaantay shakhsi hoggaamintiisu wanaagsanayd oo Maraykankana saaxiib la ahaa.
Amiir Suldaan oo muddoba dibadda ku maqnaa, waxa uu sannadkii 2009 qalliin ku galay cusbitaal ku yaala magaalada New York halkaas uu muddo sannad ah ugu maqnaa Maraykanka iyo goob nasasho oo ku taala dalka Moroco.
Waxa la sheegaa in Suldaankani intii uu ahaa wasiirka gaashaan-dhigga uu kharash aad u badan ku bixiyey qalabka Milatariga taasina waxa ay ka dhigtay Sucuudiga mid ka mid ah dalalka ugu iibsiga badan saanadda milatari.
In kasta oo maamulka Sucuudigu ku adkaysanayey in laga daweeyey xannuunkii hayay, hana dibloomasiyiinta joogta Riyadh waxa ay sheegeen in awooddiisii maamul la dhimay, hawshii shaqo ee uu hayayna ku soo koobay laba saacadood maalintii.
In badan oo ka mid ah hawshiisa shaqo ayaa si caadi ah loogu wareejiyey Amiirrada kale ee boqortooyada, gaar ahaan inta la ogyahay wiilka uu dhalay ee Khaled oo hoggaaminayey ciidamadii Sucuudiga iyo kuwii kale ee Carbeed ee sannadkii 1991 dagaalka la galay ciidamadii Iraq ee qabsaday dalka Kuweyt. Amiir Khaled, oo ah gacan-yarada wasiirka Gaashaan-dhigga, waxa uu sidoo kale iska leeyahay jariiradda dalalka Carabta laga wada yaqaano ee Al-Hayaat.
Marxuum Amiir Suldaan wakhtigii uu hayay xilka wasiirka Gaashaan-dhigga, waxa uu balaayiin Dollar ku bixiyey casriyeyna Milatariga dalkan oo diinta Islaamku ka bilaabantay 1400 sanno horteed, isaga oo waliba ciidamada qalabka sida ee dalkaas ka dhigay wax ka badan 100,000 oo nin, hubka casriga ah ee caalamka laga istcmaalana soo iibsaday.
Somalilandpost.net
Contact@somalilandpost.net
